Erfalasortaarsimanerup paasissutissartaa

Kalaallit namminerisaminnik erfalasoqartariaqarnerat saqqummiunneqaqqaarpoq ukioq 1973-imi, taama isummersimapput, Aqissiaq Møller, Peter Frederik Rosing, Finn Lynge, Erik Hammeken aamma Leif Aidt Savalimmiuniitillutik. Tamatuma kingorna isumassarsiartik Atuagalliutitigut (AG)-kut saqqummiuppaat siunnersuuteqar-nermikkut ilalerneqaqisumik.

Taava 1974-imi Atuagalliutit (AG) erfalasussamik unammisitsimmat taamani erfalasorineqartoq dan-skit erfalasuat kalaallillu ukiuni 250-it sinnerlugit atorsimasaat tupaallaataasumik ajugaavoq.

Taamaakkaluartoq kalaallit immikkut erfalasoqartariaqarnerat puttarsineqartuarpoq, ukiullu ikittunnguit qaangiutiinnartut inatsisartunut ilaasortaq Hendrik Nielsen siunnersuuteqarpoq nunatta namminerisaminik erfalasoqalernissaanik.

Namminersorlutillu Oqartussat nuna tamakkerlugu unammisitsipput erfalasussamik, siunnersuutillu 620-nik ikinnerunngitsut nassiunneqarput. Erfalasortaarnissaq pillugu ataatsimiisitaliortoqarmat, ataatsimiisitaliamut ilaasortat ukua toqqarneqarput: Niels Carlo Heilmann, Otto Steenholdt, Hendrik Nielsen, Jens Geisler siulittaasuullunilu Jonathan Motzfeldt.

Ataatsimiisitaliaq siunnersuuterpassuit akornannit piukkunnarnerpaasorisaminnik marlunnik toqqaapput. Toqqagaat, siulleq tassa sanningasortalik erfalasut ilusaannik paasisimannittup Svend Tito Achen-ip siornaammat aviisimi Politiken-imi siunnersuutigisaatut ittoq, aappaalu sanningasortaqanngitsoq taanna eqqumiitsuliortup Thue Christiansen-ip kultureqarnikkut atuartitaanikkullu naalakkersuisuusimasup siunnersuutaa.

Siunnersuut taaneqartoq kingulleq toqqarneqarpoq, taannalu nunatta erfalasortaaraa.

(Paasissutissaq ilaatigut Atuagalliutinit (AG 1985)-mit tigulaagaavoq.)