Erfalasumik atoqqaartitsineq. Sinerissamilu pingaartorsiornerit 21. juni 1985.

Ulloq ”Ullortuneq” juunip 21-at 1985 eqqorlugu Erfalasorput Kalaallit Nunaat tamakkerlugu atoqqaartinneqarpoq.

Ukiuni nutaanerusuni Inuiattut ullorsiorneq inoqarfinni tamarluinnarni erfalasortaatta erfalasulerfinnut siullerpaamik amuneqarpoq erfalasulerfiullu saani oqalugiartoqarluni, Nunarput, siuligut siunissarlu pillugu.

Innuttaasut erinarsoqatigiipput erfalasortaarput pillugu erinarsuusiamik. Erinarsoqatigiillu tusarnaartitsillutik erinnanik tusarnersunik taallalinnik imartuunik.

Taamatut pisoqareermat nalliuttorsiortut oqaluffimmut naalagiariakaapput erfalasoq Katinngat siullinngorlugu.

Naalagiarnermi oqaluussisut Nunarput siuligullu unnersiutigaat, Nunatsinni inuuffigalugu alianaatsorsuarmi aammali peqqarniitsorsuusinnaasumi inuuniarnikkut atortutik inuiannit allanit nikanartutut isigineqaraluartunik ilaatigullu aamma malissuarnut issersuarmullu minnerunngitsumillu piniakkanut imaannaanngitsorsuarnut akiuullutik ulloq manna tikillugu nunarujussuatta sineriaani isorartoorsuarmi inuuginnarsinnaasimanitsinnut tunngaviliisuummata.

Naalagiartut asuunnginneranni tussiut ”Naalannangaartoq Guuterpunaa!” atorneqareermat naalagiarneq naammassimmat piffinni tamarluinnarni naasortaliinerit nigalilianillu, toqukkut qimagutereersimasut eqqaaniarlugit ilioraasoqarluni.

Uvalikkut nunamut asiarluni aliikkusersoqatigiinneq kalaallillu qangaanilli periaasiat malillugu killuutsigut nerisassanik nunatta tunniussaanik igaartorneq nerersuaqatigiinnerlu ingerlanneqarluni.

Unnukkut ullorsiorneq naggataarlugu katersortarfinni timersortarfinniluunniit aliikkusersoqatigiittoqarpoq isiginnaartitsinerit erinarsoqatigiinnerillu ingerlanneqarlutik naggataagullu pinngitsoorneqarsinnaanngitsoq Qitik ingerlanneqarluni. Qitinneq naammassimmat unnussiummik erinarsoqatigiinneq.

Naggaterpiaatigullu silami qummoroortarneq ingerlanneqarluni.