Ulloq ”Ullortuneq” juunip 21-at 1985 eqqorlugu Erfalasorput Kalaallit Nunaat tamakkerlugu atoqqaartinneqarpoq.
Taamanikkulli ingerlaannaq inunnit malugineqarpoq “equngasoqartoq” tassa Erfalasortaarput amuneqarmat peqatigiiffiit katinngsisaarlutik najuuttut katinngataasa erfalasortaa allaammat tassalu qallunaat erfalasuat “Danebrog”.
Ullortunersioqqaarnitta kingorna peqatigiiffiit katinngataasa pisortaniit qanoq piniarneqarneri pillugit oqartoqarneq ajormat, sinerissamiittugut “peqatigiiffilerisuusugut” aperisalerpugut: Peqatigiiffiit katinngataasa qanoq iliorfigineqarnissaannut pilersaaruteqartoqarnersoq? Saaffiginnikkattalu akineqarpugut: “Erfalasortaareerpusi ilissi sinnera isumaginiarsiuk”.
Taamaariarmat sinerissami peqatigiiffilerisut ilaasa anguniartariaqalersoraat kattuffeqalernissaq Erfalasorput pillugu.
Sinerissap ilaanut paasiniaasarnertigut paasineqarpoq Nuummi tamanna siunertaq anguniarlugu inunnik eqeersimaartunik suliniartoqalersimasoq Søren Joelsen siuttuliullugu. Aammalumi Sisimiuni Paamiunilu aamma taamatut suliniartoqartoq.
Kattuffeqassappat peqatigiiffeqartariaqarmat peqatigiiffiit siulliit aallartinneqarput ukuusut:
Peqatigiiffik “Erfalasorput” Nuummi, aallartinneqartoq 20. april 1988, makkua siulersuisunngorlutik: Siulittaasoq – Søren Joelsen, siul. tullia – Jørgen Pjetturson, aningaaserisoq – Pavia Christiansen, allatsi – Jonathan Berthelsen, siul. ilaasortaq – Jens Olsvig.
Peqatigiiffik “Erfalasorput” Paamiut aallartivinneqartoq 22. april 1991, makkua siulersuisunngorlutik: Siulittaasoq – Konrad Brummerstedt, aningaaserisoq – Sofie Lorentzen, allatsi – Poul Møller, siul. ilaasortaq – Tittus Andreassen.
Kattuffiup pilersinneqarnera.
Peqatigiiffiit pilersinneqartut sulinerat aallartilluariarmat misilittakkallu takutimmassuk kattuffiliornissaq pisariaqartinneqalersoq peqatigiiffiit taaneqareersut aqutsisuinit aalajangerne qarpoq november-ip sisamaani kattuffik pilersinneqassasoq Sisimiuni Amerlumi.
Piffissaq nallermat kattuffimmik pilersitiniarneq aallartippoq ullaakkut nal. 9.00, politeeq soraarneq Vilhelm Olsen pilersitsiniarnermi aqutsisoralugu.
Ulloq naangajallugu oqallittoqareersoq Kattuffik “Erfalasorput” pilersinneqarpoq ukualu siulersuisussatut toqqarneqarput:
Siulittaasoq: Søren Joelsen. Nuuk
Siulittaasup tullia: Samuel Akaaraq Olsen. Sisimiut
Aningaaserisoq: Jens Olsvig. Nuuk
Allatsi: Jonathan Berthelsen. Nuuk
Siulers. ilaasortaq: Kâlêraq Bech. Sisimiut
