Erfalasorput pillugu taalliat
Peqatigiiffik siulleq aallartinneqarmat innuttaasunit tapersersorneqarluarpoq aamma
Erfalasortaarput pillugu taallianik tigusaqartaannarpugut, taakkualu ilaatigut imaapput:
Una taallannguaq unnummi peqatigiiffimmik pilersitsinermi tiguneqartoq Hans Petrussen-imit
tunniunneqarpoq imalu allassimavoq: Erfalasorput pillugu-mut!
Peqatigiiffimmut soqutigilluinnakkannut aallartinnissassinnut assut tapersersorpassi.
Qanortoq nuannersumik paaseqatigiilluarnikkut peqatigiiffittaarsi siunissami ingerlalluarili.
Taallaq: Ukiut 25-it ullorsiorpavut
(erinaa: Inuunerup pereersup sarsuttaraanganga)
1 Ukiut 25-it ullorsiorpavut
Erfalasutta maana amuneqarfia
Nunanni sumiluunniit siaruarfia
Pingaartitatta uumap qullarneqarfia
nakuussutaagami
Inuiattut taanna ataqqisaagami.
2. Erfalasorput illit pingaarteqaatsigit
Inuunitta ilaatut isigivatsigit.
Amusaraatsit kikkut sumiittaraangamik
Kalaaliulluartut tulluusimaarlutik.
Qinngorneqaravit
Seqinivittut aamma iluseqaravit.
Taalliortoq: Karl Kristian Lennert – juuni 2010.
Taallaq: Katinngat nunatta pigaatit
(erinaa: najortillunga asangaannga)
1. Katinngat nunatta pigaatit
nutaasumik takkuttutit
ullaakkut seqernup pilersup
seqermatit pinnerputit.
2. Katersortugut avatinni
sumiikkutta saappatsigit
sunillu sulissussinermi
ataatsimut kattuppatit.
3. Katinngatiga asavakkit
uvannut pingaartuugavit
ataqqillutillu pigaakkit
nunannut tunissutitut.
Taalliortoq: Karl Kristian Lennert – maj 2004.
Taallaq: Seqernup qaamanertaa
(erinaa: nammineq erinalik)
1. inuiaat kalaallit
eqeersimaarluartut
asanningaartut nunamut
pigisaminnut nammineq
takussuserniarlugit
amussavarput manna.
2. inuiaat kalaallit
ilisarineqaataat,
asallugu isigisaat
pigisaq namminerisaq
takussut uvagutsinnut
seqernup qaamanertaa.
3. inuiaat kalaallit
nunaat avani ittoq
sermersuarmik qalligaq
iluliarsuarpalik
allat tupigingaartagaat
soorlu qalipagaannaq.
4. inuiaat kalaallit
seqernat qaamangaartoq
tungutsurimmik qilalik
sarfarsiat sikorsuit
imarsuarmi tarratik
peqatigilluarpaat.
5. inuiaat kalaallit
imminnut aqulersut
takussuserniarlugit
amuneqartarilitoq
kinaassusermut ersiut
kalaallit pigisassaat.
Taalliortoq/erinniortoq: Sofus Joelsen – 12.02.1985.
Taallaq: Katinngat tikilluangaarit
(erinaa: inuuffiga ungagaakkit)
1. Katinngat tikilluangaarit
Taartaasutit ullumi
Ataqqiuaannarpakkit
Nutaaq ukiortaami.
2. Atorfissat nalleraangat
Noqinneq saperpunga
Nuannaarpunga qullaraangat
Eqqissivoq tarniga.
3. Kalaallip nipaatut ippoq
Nutaasumik noqqaasoq
Kinaassutsimik nittaasoq
Kalaallimut uuttuuttoq.
Taalliortoq: Karl Kristian Lennert. 28. jan. 2012. (Erfalasorput Sisimiut nutaamik katinngatitaarnerani).
Taallaq: Qaasuitsup qaamanera
Taalliortoq/erinniortoq: Johan Eliassen
1. Erfalat kalaallit perput pinneqaaq
aappalaartoq qaqqorittalik.
Qaamaneq, kaperlak, sermeq, sikutaaq,
asseqarput tulluartumik.
Taassuma kalaallip pissusaa uliissavaa
taamatut nakuussusissavaa.
2. Aasarissup qaamaneq pilersitaa
Qiimanartoq allisittaraat.
Nalliuttup, ullup suup, pingaarutaa
tamaginnut takutittaraat.
Arsuartutut pingaartitaarpaluttutut
Qiimanermik qungujuttutut.
3. Qaasuitsup unnua tikippagu
nunavitta sinilersutut.
Taarnerup inuuneq aqqusaarpagu
tarningit qaminniartutut.
Taartuartumi ikippat neriunnera
Nuisittutut seqinera.
4. Iigareersut sermit kassutarasaat
qiimanartut piniakkanut
ullut nikerartuartut assigaat,
soorlumi oqarniartutut:
Qaa, suliinnarit nukissamik ujarlerit
pilluarsaruk inuunerit!
5. Erfalat katinngaterput pillutit
pilluaammik nikuippunga.
Sakkugaatsigit kalaallit – qinngorit
seqinertut qaammarissumik!
Erligissavakkit asasattut taallutit:
”Qaasuitsup qaamanera” nik
Taalliortoq/erinniortoq: Johan Eliassen.: Erinaanik aaqqissuisoq: Akaaraq Samuel Olsen. (tak. Ataaniittoq)
Taallaq: Nunatta erfalasua
(erinaa: Timmiaaqatut sulunnit, Friedrich Silcher)
1. Erfalasoq isigaara
nunama pigisaraa
qullagaasoq pinnaraara
asaqaara erligaara
nunama pigisaraa.
2. Erfalasoraat kalaallit
ersarissoq tamanut
tulluartoq qaallorimmut
aasarissumilu aamma
kusanarluni ila.
3. Asanninneq aappalaartoq
qalipaatip aapparaa
qaqortorlu ersarissoq
taannalu isumaqarli
nunaga eqqissili.
4. nuannaarluta kalaallit
takuarput uvani
qullagaasoq katinngapput
nalliummat ullulaami
nunagisap ullua.
5. nuannersuni tamani
aamma artornartuni
qullagaaguit atinni
tassanimi misigaarput
pilluta atortutit.
6. illit pigisarivaatit
inuit kalaaliviit
qullagaaguit katinngat
nalunaarutaa unaammat
nunaga asavagit.
Taalliortoq: Pavia Lyberth – marts 1986.
