Kattuffiup siunertaa oqariartuutaalu eqqaaginnaraanni unaasoq:

“ERFALASORPUT” nuna tamakkerlugu suleqatigiiffiuvoq, naalakkersuinermi suliniaqatigiiffinnut attaveqanngitsoq.

Inuiaat kalaallit nunaminnut erfalasuminnullu asanninnerata ataqqinninneratalu ataavartinneqarnissaat siunertaraa.

Siunertaq anguniarneqassaaq makku aqqutigalugit:

• – Kalaallit erfalasuata ataatsimuussusermut pingaaruteqarneranik eqqortumillu atorneqarnissaanik paasisitsiniaanikkut.
• – Katinngatinik peqatigiiffinnut, suliniaqatigiiffinnut, suliffeqarfinnut kiisalu inunnut ataasiakkaanut piniussisarnikkut, siunertanillu inunnut iluaqutissaasunik tapersersuinikkut”. 

Soorlu, uuminnga atuartunit ilimagineqassagunaraluartoq erfalasorput Kalaallit uagut inuiattut “Erlinnartuutitsinnut” ilaatinneqassagaluartoq soorlu makku taama pineqartut:

• – Inuiattut assuutitsinnut, arnat kalaallisuui kitaani tunumilu kiisalu angutit assuutaat.
• – Inuiattut “perput” Qajaq, tammatsaalineqarlunilu timersuutitut atugaaneratut kiisalu
• – Inuiattut “pigut” Avannaata qimussersua, illersuisualu.

Taakku suliniaqatigiiffiit qulaani taaneqartut Nunatta karsianiit aningaasatigut taperneqartarput.

Kisiannili kattuffik “Erfalasorput” taamatut pineqarnikuunngilaq, naak ukiualussuanngortuni Inatsisartoqarfimmut saaffiginnittaraluarluta aammalu illersuisoqarnissarput kissaatigisaraluarlugu, tamakkunanngaaniit eqqarsaatigineqarsinnaanngitsutulluunniit isumaqarfigineqarpasimmat. Kalaallit inuiaat ataatsimuussuseq anguniarlugu aqqutissarsiortut, paasineqartaratilli.

Erfalasorput 1995 -imi ukiunik qulinngortorsiulermat iluatitsilluta taamanikkut TELE Post Greenland suleqatigalugu frimærkimik nutaamik saqqummiisipparput akitsuutaa 50 øre katuffimmut nakkartussanngorlugu, tamannalu iluatsilluarpoq kr.300.000,- missaai pisarsiarigatsigit. Taakkua aningaasat takuinnarlugit amerlaginarsinnaagaluartut katinngatinik ataatsikkut amerlanaarlugit piniaraangatta atorluartarpagut, katinngatillu akitsuusernagit peqatigiiffinnut piniartunut pisiaritittarlugit, taamaalilluta aningaasatigut sillimmatigut nungunnaveersaarpagut.

Siulersuisut piumassutsiminnik akissarsiaqaratik suligamik aningaasartuutaanngillat, ataatsimiinnerni tumannguersaatimininnguit eqqaassanngikkaanni.

Ukiorpaalussuarni kattuffiup ingerlatinneraniit oqartussanut aningaasanik qinnuteqartarsimagaluarpugut itikkaajuarlutali. Aatsaalli kattuffitta aallartinneraniit ukiut 30 -it qaangiutillartullu qinnutigisartakkagut tusarneqarput, Namminersorlutik oqartussaniit allagarsigatta Tips- aamma lottomiit immikkoortitat C-miit ingerlatsinermut tapiissutisinissamut qinnuteqarnitsinni akuerineqaratta.

Ukiut taakkua ingerlaneranni uvagut ingerlatsisuusut inuttut pilliuteqartarpugut, toqqorsiveqarneq, allaffeqarneq, atortusallu allat pisariaqartut isumagineri ingerlattarsimagatsigit. 

Aammattaarlu Nunarput tamakkerlugu “Erfalasorput ima atorneqartariaqarpoq” atuagaaraq ukioq 2007-imi saqqummersissimavarput, suliffeqarfiit inuillu ataasiakkat naqitertinneranut aningaasaliisinnerisigut. Imai tamaasa uvagut sunngiffipput atorlugu suliaralugit.

Kissaatigisarsimagaluarparput sinerissatsinniit Peqatigiiffiit katinngatinik piniussatta oqartussaninngaaniit akikillisaatissanik tapiissuteqartarsinnaanissaat, ullumikkut aamma katinngatinik piniarnermi akit qaffakkaluttuinnarnerat pissutigalugu.