Ukioq 2007 Kattuffik Erfalasorput-minngaaniit atuagaaraq “Erfalasorput ima atorneqartariaqarpoq” saqqummersipparput NunaFonden, Juullip nipitittagaa allallu fondit kiisalu suliffeqarfiit, suliniaqatigiiffiillu, aningaasanik atuagaaqqap imaata aaqqissuunnissaannut naqiterneqarnissaanullu aningaasaliisoralugit.

Atuagaaqqap taassuma imarivai, erfalasutta nassuiaataa, inatsisit, erfalasup isikkua, erfalasulertarneq, peqatigiiffinni kattuffinnilu katinngasisaartarneq il.il.

Kingusinnerulaartukkullu Qarasaasiakkut nittartakkamik aallartitsivugut tassuunattaaq atuagaaqqap imai takuneqarsinnaasunngorlugit.

Maannakkullu ukiualunni pilersaarutigereersimallugu Qarasaasiakkut nittartagarput paasissutissanik amerlanerusunik sukumiinerusumillu Kattuffitta sooq aallartittariaqarsimaneranik paasissutissiisoq ilanngupparput.

Nittartakkatta imarai: Saqqaata saniatigut takuneqarsinnaapput, erfalasutta nassuiaataa, erfalasortaarsimaneq atoqqaartitsisimanerlu.

Kattuffik pillugu paasissutissat, kattuffiup siunertaa malittarisassaalu, aningaasatigut ingerlaneq, erfalasorput pillugu taalliat kiisalu kattuffimmut ilaasortanngorniaraanni immersugassaq.

Kattuffimmi siulersuisut, kikkut siulersuisuunersut aammalu ataqqinaammik ilaasortat.

Erfalasorput atussagaanni suut piumasaqaataanersut, isikkua angissusaalu, inatsisit maleruagassallu, peqatigiiffinni kattuffinni suliniaqatigiiffinniluunniit katinngasisaartarnermut paasissutissat assigiinngitsut. Kiisalu isiginnaagassiannguit erfalasumaartarnermik takutitsisut.

Katinngatinik piniussisarneq aammalu erfalasulerfinnik katiterneqarsinnaasunik erfalasortassaanillu piniussisoqarsinnaavoq kattuffiup Email-lia atorlugu.

Kattuffik Erfalasorput

Kâlêraq Bech

Siulittaasoq